صدر مملکت ڈاکٹر مسعود پزشکیان نے ہفتے کی صبح کو تہران میں پاکستان کی فوج کے سربراہ فیلڈ مارشل عاصم منیر سے ملاقات اور گفتگو کی۔
صدر مملکت نے اس موقع پر خطے میں قیام امن اور استحکام کے لیے پاکستان کی کوششوں کا خیرمقدم کیا اور کہا کہ پاکستان کے عوام اور حکام ایران کے برادر ہیں اور ہمارے رشتے مضبوط ہیں۔
انہوں نے دنیا کے تمام مسلمانوں کو ایک جسم کا اعضا قرار دیا اور کہا کہ امت مسلمہ کے سامنے اتحاد اور تعاون کے علاوہ کوئی دوسرا راستہ نہیں ہے اور اس کے لیے معاشی، سماجی، سیاسی اور ثقافتی تعلقات کو مزید مضبوط کرنے اور اختلاف اور محاذآرائیاں ختم کرنے کی ضرورت ہے۔
ڈاکٹر مسعود پزشکیان نے عالمی قوانین کی اسلامی جمہوریہ ایران کی جانب سے مکمل پابندی کا ذکر کرتے ہوئے پاکستان کی فوج کے سربراہ سے زور دیکر کہا کہ ہم اپنے عوام کے مسلمہ حقوق کے خواہاں ہیں لیکن امریکہ کے ساتھ مذاکرات اور ماضی کے تجربات کے پیش نظر ہم سوچ سمجھ کر قدم اٹھا رہے ہیں۔
صدر مملکت نے صاف انداز میں کہا کہ امریکہ اس تنازعے سے کامیاب ہوکر باہر نہیں نکل سکتا۔
انہوں نے کہا کہ اس جنگ کے نتیجے میں علاقے اور دنیا کے ملکوں کو بھاری نقصان پہنچے گا اور بس صیہونی حکومت ہے جو اس جنگ کے ذریعے اپنے مفادات حاصل کرنا چاہتی ہے۔
صدر مسعود پزشکیان نے زور دیکر کہا کہ امریکہ کے ہاتھوں مسلسل عہدشکنی اور مذاکرات کے بیچ جارحیت اور اعلی عہدے داروں کے قتل کے نتیجے میں ایرانی عوام کو واشنگٹن پر ذرہ برابر بھروسہ نہیں ہے۔
انہوں نے کہا کہ پاکستان جیسے دوست اور برادر ملک کے ساتھ تعلقات کی بنیاد پر مذاکرات کو قبول کیا ہے لیکن تہران کا اصل ٹارگیٹ مناسب راستوں سے ایرانی عوام کے مفادات کو پورا کرنا ہے۔
اس موقع پر پاکستان کی فوج کے سربراہ فیلڈ مارشل عاصم منیر نے ڈاکٹر مسعود پزشکیان سے دوبارہ ملاقات پر اظہار مسرت کرتے ہوئے پاکستان کے وزیر اعظم اور صدر کا سلام صدر ایران کو پہنچایا۔
انہوں نے کہا کہ مذاکرات کا سلسلہ بقول ان کے بخوبی آگے بڑھ رہا ہے۔
پاکستان کی فوج کے سربراہ نے صدر مسعود پزشکیان کے اس موقف کی تعریف کرتے ہوئے کہ اسرائیل مسلمانوں کے درمیان اختلافات اور محاذآرائی کا فائدہ اٹھانا چاہتا ہے کہا کہ اسرائیل پاکستان سمیت جھڑپوں کو ختم کرنے کی کوشش کرنے والے ہر کسی کا سنجیدہ دشمن ہے۔
انہوں نے کہا کہ صیہونی حکومت کو خطے میں استحکام اور سلامتی سے کوئی سروکار نہیں ہے۔
فیلڈ مارشل عاصم منیر نے کہا کہ وہ خطے میں صرف استحکام اور جنگ کا خاتمہ چاہتے ہیں۔
انہوں نے امید ظاہر کی کہ ان مذاکرات کا نتیجہ، ایران اور خطے کے تمام ممالک اور مسلمانوں کے حق میں ثابت ہو۔