حجۃ الاسلام والمسلمین ابوترابی فرد نے حضرت فاطمہ زہرا سلام اللہ علیہا کے یومِ شہادت کے موقع پر نماز جمعہ کے خطبوں میں ایران کی دفاعی صلاحیتوں، میزائل پروگرام اور خطے کی سیاسی و سلامتی کی صورت حال پر گفتگو کی۔

انہوں نے ہفتۂ فضائیہ و خلائی ٹیکنالوجی اور ایرانی میزائل صنعت کے بانی شہید حسن طہرانی مقدم کی برسی کا ذکر کرتے ہوئے کہا کہ شہید طہرانی مقدم، شہید حاجی زادہ اور دیگر کمانڈروں کی کوششوں سے ایران دنیا کے بڑے میزائل ذخائر رکھنے والے ممالک میں شامل ہوا ہے۔ ان کی علمی صلاحیتوں اور دفاعی منصوبہ بندی نے ایران کی دفاعی طاقت میں نمایاں اضافہ کیا ہے۔

انہوں نے کہا کہ ایران کی دفاعی حکمت عملی کا بنیادی مقصد یہ ہے کہ دشمن کو جارحیت کی ایسی قیمت ادا کرنی پڑے جو اس کے لیے ناقابل برداشت ہو۔ اس مقصد کے لیے جدید، درست نشانہ لگانے والے اور راستہ تبدیل کرنے کی صلاحیت رکھنے والے میزائل تیار کیے گئے ہیں۔ ایران کی فضائی و خلائی صنعت نے مقامی سطح پر سیٹلائٹ، راکٹ اور انہیں خلا میں بھیجنے کے نظام میں بھی اہم کامیابیاں حاصل کی ہیں۔

امام جمعہ تہران نے مزید کہا کہ سپاہ پاسداران کی فضائی و خلائی فورس کی میزائل صلاحیت اور نئے میزائل شہر کی رونمائی ایران کی دفاعی تیاریوں کا مظہر ہے۔ انہوں نے کہا کہ مغربی ایشیا اس وقت بڑی سیاسی، اقتصادی اور سلامتی کی تبدیلیوں کے مرحلے سے گزر رہا ہے اور امریکہ کی بالادستی کمزور ہو رہی ہے۔

ابوترابی فرد کے مطابق ایران ایک ابھرتی ہوئی ثقافتی، سیاسی اور فوجی طاقت کے طور پر خطے کے عوام اور محورِ مزاحمت کے حق میں طاقت کا توازن تبدیل کرنے میں فیصلہ کن کردار ادا کر رہا ہے۔ انہوں نے غزہ کے عوام، حزب اللہ لبنان اور یمن کی مزاحمتی قوتوں کی ثابت قدمی کو بھی خراجِ تحسین پیش کیا۔

انہوں نے امریکی خارجہ تعلقات کونسل کے سربراہ مائیکل فرومن کے ایک مضمون کا حوالہ دیتے ہوئے کہا کہ خطے میں امریکی فوجی اڈوں کی موجودگی اب خود علاقائی ممالک کی سلامتی کے لیے سوال بن چکی ہے۔ ان کے مطابق مستقبل میں خطے کی سلامتی کا نظام خود علاقائی ممالک کے درمیان تعاون سے تشکیل پانا چاہیے۔

انہوں نے تہران میں سعودی عرب، ترکی اور پاکستان کے اعلیٰ حکام کی شرکت سے ہونے والی ملاقات کا ذکر کرتے ہوئے اسے خطے کے مستقبل کے مشترکہ سلامتی نظام کی جانب اہم قدم قرار دیا۔

خطیب جمعہ نے خطبے کے آغاز میں حضرت فاطمہ زہرا سلام اللہ علیہا کی عظمت بیان کرتے ہوئے کہا کہ رسول اکرم صلی اللہ علیہ وآلہ وسلم نے آپؑ کو خصوصی مقام عطا فرمایا اور آپؑ کو ’’اُمِّ اَبیہا‘‘ کے لقب سے یاد کیا۔