اسلامی جمہوریہ ایران کی وزارت خارجہ کی ترجمان مرضیہ افخم نے اس امید کا اظہار کیا ہے کہ پہلی فرصت میں ہی مصر کی حکومت کے تعاون کے ساتھ ایران کی ہلال احمر سوسائٹی کی انسان دوستی پر مبنی امداد غزہ کے عوام تک پہنچا دی جائے گی۔ اسلامی جمہوریہ ایران کی وزارت خارجہ کے پریس آفس کی رپورٹ کے مطابق مرضیہ افخم نے اس بات کو بیان کرتے ہوئے کہ دفتری اور تکنیکی مسائل کی وجہ سے غزہ کے لوگوں تک پہنچنے میں تاخیر ہوئي ہے کہا کہ مصر کی حکومت کو جلد از جلد ایران کی ہلال احمر سوسائٹی کی انسان دوستی پر مبنی امداد غزہ کے فلسطینوں تک پہنچائے جانے کے لۓ پرمٹ جاری کرنے کا اقدام کرنا چاہۓ۔

تہران کے خطیب جمعہ نے صہیونی حکومت کی مخالفت کو ملت ایران کے اتحاد کا محور قرار دیا ۔ تہران کے خطیب نماز جمعہ نے عالمی یوم قدس کے جلسے جلوسوں میں ایران کی مقننہ، عدلیہ اور انتظامیہ نیز علماء اور شخصیات، گروہوں اور پارٹیوں کی جانب سے شرکت کی دعوت کی طرف اشارہ کرتے ہوئے کہا کہ یہ وحدت و اتحاد ہی، ملت ایران کا راستہ ہے ۔ آيۃ اللہ سید احمد خاتمی نے امام خمینی رہ کو صہیونی حکومت کے خلاف جدوجہد کاعلمبردار قراردیا اور کہا کہ بانی انقلاب اسلامی نے عالمی یوم قدس کا اعلان کرکے مسئلہ فلسطین کو ذہنوں سے محو نہيں ہونے دیا ۔ تہران کے خطیب جمعہ نے کہا کہ اسلامی جمہوریۂ ایران، ہمیشہ سے فلسطینی عوام کی مظلومیت کی حمایت کا مرکز رہا ہے اور ہے اور فلسطین کی ہمہ جانبہ حمایت کرتا رہے گا ۔ انہوں نے غزہ میں گذشتہ اٹھارہ دنوں سے جاری اسرائیل کے وحشیانہ حملوں کی جانب اشارہ کرتے ہوئے ، آٹھ سو سے زائد افراد کے زخمی ہونے اور پانچ ہزار سے زائد افراد کے زخمی ہونے کو اسرائیل کی وحشیانہ پالیسی کی ایک مثال قرار دیا۔ انہوں نے کہا کہ فلسطین عوام کو عزت و عظمت، مزاحمت و استقامت کے ذریعے اپنا حق واپس لینے سے ہی حاصل ہوجائے گي۔ اور امریکہ، برطانیہ اور جرمنی کو یہ جان لینا چاہئے کہ بچوں کے قتل عام کی ان ملکوں کی جانب سے حمایت، اپنی قوموں کے حق میں خیانت کے مترادف ہے ۔ آيۃ اللہ خاتمی نے اس بات کا ذکر کرتے ہوئے کہ غزہ کے واقعے کے حوالے سے بین الاقوامی اداروں، عرب لیگ اور بعض اسلامی ملکوں کا طبل رسوائی بج چکا ہے، عرب ملکوں کو خطاب کرتے ہوئے کہا کہ تمہاری عرب اور اسلامی غیرت کہاں چلی گئی کہ ایک مسلمان قوم اس طرح سے محاصرے میں اپنی جان دے رہی ہے جبکہ امریکہ نہ انسانی حقوق سمجھتا ہے اور نہ ہی دہشت گردی سے مقابلے پر اس کا اعتقاد ہے ۔ انہوں نے تکفیری گروہوں منجملہ گروہ داعش کو استکبار کی کٹھ پتلی قرار دیا کہ جن کی اسرائیل حمایت کررہا ہے ورنہ وہ فلسطین کے مظلوم عوام کی حمایت کرتے۔ تہران کے خطیب جمعہ نے ایران اور گروپ پانچ جمع ایک کے مذاکرات میں چار ماہ کی توسیع کے بارے میں تسلط پسند نظام کو خبردار کرتے ہوئے کہا کہ اگر وہ ایران کی مسلم قوم سے خراج حاصل کرنے کی فکر میں ہے تو وہ غلطی پر ہے کیوں کہ زیادہ طلبی کے ذریعے ملت ایران سے خراج نہیں لیا جاسکتا ۔

ارنا کی رپورٹ کے مطابق رہبر انقلاب اسلامی حضرت آیت اللہ العظمی سید علی خامنہ ای نے بدھ کی شام ایران کی مختلف یونیورسٹیوں کے طلبہ کے ساتھ ہونے والی ملاقات میں غزہ کے عوام کے خلاف صہیونی حکومت کے حالیہ جرائم کی طرف اشارہ کرتے ہوئے تاکید کی کہ انسانی تصور سے بالاتر یہ جرائم، درحقیقت صہیونی حکومت کی بھیڑیا صفت اور بچوں کی نسل کشی پر مبنی طینت کا حصہ ہے اور اس کا علاج صرف صہیونی حکومت کی نابودی اور اس کا خاتمہ ہے، البتہ اس وقت فلسطینیوں کی ٹھوس اور مسلح مزاحمت اور غرب اردن میں اس کی توسیع اس وحشی حکومت کے مقابلے کی تنہا راہ ہے۔

رہبر انقلاب اسلامی نے فرمایا غزہ کے مظلوم عوام کو اس وقت جن مصائب کا سامنا ہے وہ اس غیرقانونی و جعلی صہیونی حکومت کی 66 سالہ عمر میں وحشیانہ جارحیت پر مبنی پالیسی کا حصہ ہے اور غاصب صہیونی حکومت متعدد بار بڑی ڈھٹائی کے ساتھ اس قسم کی گستاخیاں انجام دیتی رہی ہے۔

رہبر انقلاب اسلامی حضرت آیت اللہ العظمی خامنہ ای نے بانی انقلاب اسلامی حضرت امام خمینی (رح) کے اس ارشاد کہ جس میں آپ نے فرمایا تھا کہ اسرائیل کو حتمی طور پر صفحہ ہستی سے مٹ جانا چاہیے، کی طرف اشارہ کرتے ہوئے تاکید کی کہ البتہ اسرائيل کی نابودی اس علاقے سے یہودی عوام کی نابودی کے معنی میں نہیں ہے بلکہ اس کے لئے منطقی اور عملی کام کی ضرورت ہے اور اسلامی جمہوریہ ایران نے اس حوالے سے راہ حل عالمی اداروں میں پیش کیا ہے۔

رہبر انقلاب اسلامی نے مزید فرمایا اس کام کے لئے ضروری ہے کہ اس علاقے میں زندگی بسر کرنے والے عوام اور وہ افراد کہ جن کا تعلق اس علاقے سے ہے، وہ اپنی من پسند حکومت کے لئے ایک ریفرنڈم کا اعلان کریں اور اس کے ریفرنڈم کے ذریعے غاصب و جعلی حکومت کا خاتمہ ہوجائے گا۔

رہبر انقلاب اسلامی نے جنگ بندی کے لئے صہیونیوں کی کوشش کی طرف اشارہ کرتے ہوئے فرمایا کہ ایسی حکومت کہ جو انسان کے تصورات سے بالاتر جرائم کی مرتکب ہو رہی ہے، فلسطینیوں کی طاقتور مزاحمت کے سامنے بے بس نظر آرہی ہے اور کسی بھی راہ حل کے درپے ہے اور اس سے ثابت ہوتا ہے کہ صہیونی صرف اور صرف طاقت کی زبان سمجھتے ہیں۔

رہبر انقلاب اسلامی نے غزہ کے عوام کی سیاسی حمایت کو تمام مسلمان و غیرمسلمان قوموں کی ذمہ داری قرار دیا اور تاکید کی انشاءاللہ یوم القدس کو دنیا ملت ایران کے عظیم الشان جوش و ولولے کا مشاہدہ کرے گی اور ملت ایران ثابت کرے گی کہ فلسطین کی حمایت کا جذبہ، اس اسلامی سرزمین میں اپنی پوری طاقت و توانائی کے ساتھ موجود ہے۔

حضرت آیت اللہ العظمی سید علی خامنہ ای نے عالمی سامراج اور ان میں سرفہرست امریکہ کی جانب سے صہیونی حکومت کے وحشیانہ اقدامات اور ظلم و بربریت کی حمایت اور غزہ کے عوام کے خلاف ان وحشیانہ جرائم کی حمایت اور دفاع کیے جانے پر شدید تنقید کرتے ہوئے فرمایا کہ چند مغربی حکومتیں خاص طور پر امریکہ اور برطانیہ کی خبیث حکومتیں ایسے جرائم کہ جن کو کوئی بھی انسان قبول نہیں کرسکتا، کا دفاع اور حمایت کررہی ہیں اور امریکی صدر بے شرمانہ طریقے سے کہتا ہے کہ اسرائیل اپنے دفاع کا حق رکھتا ہے۔

رہبر انقلاب اسلامی حضرت آیت اللہ العظمی خامنہ ای نے مزید فرمایا کہ غزہ کے مظلوم عوام پر روا رکھی جانے والی بربریت کے حوالے سے تسط پسندوں کے رویّے سے نشاندہی ہوتی ہے کہ یہ لوگ انسانی حقوق اور انسانیت پر سرے سے اعتقاد ہی نہیں رکھتے ہیں اور آزادی و انسانی حقوق کے بارے میں جو کچھ کہتے ہیں وہ آزادی و انسانی حقوق کا مذاق اڑانے کے مترادف ہے۔

آخري جمعه رمضان المبارك میں اسلامی جمہوریۂ ایران سمیت دنیاکے مختلف ملکوں میں عوام نے عالمی یوم قدس کی مناسبت سے نکالے گئے جلوسوں میں بڑی تعداد میں شرکت کی اور غزہ کے مظلوم اور نہتے عوام پر ڈھائے جانے والے اسرائیلی مظالم کی مذمت کی ۔ عالمی یوم قدس کے جلوسوں ميں شریک ایرانی عوام نے انسانی حقوق کے عالمی اداروں نیز اسلامی کانفرنس تنظیم اور دیگر بین الاقوامی اداروں سے مطالبہ کیا کہ وہ اپنے فرسودہ اور غیر موثر موقف کو ترک کرکے جعلی صہیونی حکومت کے حکام کو جنگی مجرم کی حیثیت سے سزا دیئے جانے کے لئے ٹھوس قدم اٹھائیں اور اسے اپنے ایجنڈے ميں قرار دیں ۔ عالمی یوم قدس کے مظاہرے کے شرکاء نے ایک قرارداد میں، غزہ میں صہیونی حکومت کی بربریت کو جنگي جرائم اور نسل کشی کا مصداق قرار دیتے ہوئے کہا ہے کہ ایران کی مسلم قوم، اسرائیل کے مقابلے میں فلسطینی گروہوں کے درمیان اتحاد و یکجہتی کو، بیت المقدس کی آزادی کی امنگوں کے حصول اور فلسطین کی مقدس سرزمین سے غاصب صہیونیوں کے انخلاء کا اہم ترین عامل قرار دیتی ہے ۔ واضح رہے کہ آج تہران سمیت ایران کے دیگر شہروں میں مقامی وقت کے مطابق ساڑھے دس بجے جلوسوں اور ریلیوں کا سلسلہ جاری ہوا جن میں لاکھوں کی تعداد میں بوڑھے، جوانوں ، بچوں اور خواتین نے شرکت کی۔تہران کا مرکزی جلوس تہران یونیورسٹی میں اختتام پذیر ہوا ۔ پورے ایران میں عالمی یوم قدس کی ریلیوں کو کوریج دینے کے لئے 3000 ملکی اور غیر ملکی نامہ نگار اور فوٹو گرافر موجود تھے ۔ دوسری جانب اطلاع ہے کہ 18 دنوں سے مسلسل صیہونی بمباری کے باوجود فلسطين کے مختلف شہروں ميں مظلوم فلسطينیوں نے عالمي يوم قدس کے جلوسوں ميں شرکت کی اور اپني سرزمين اور قبلہ اول کي آزادي تک اپني جد و جہد جاري رکھنے کا عزم دہرایا ۔دوسری جانب لبنان، عراق، پاکستان، ہندوستان سمیت دنیا کے 80 ملکوں میں عالمی یوم قدس کے جلوس اور ریلیاں نکالی گئیں ۔پاکستان نے غاصب صیہونی حکومت کی جارحیت کے خلاف سرکاری سطح پر غزہ کے عوام سے یوم یکجہتی منانے کا اعلان کیا ہے۔ فلسطینی عوام سے یکجہتی کے لیے جمعۃ الوداع کو پاکستان میں اس ملک کے وزیر اعظم نواز شریف کی جانب سے اعلان کے بعد یوم سوگ منایا جا رہا ہے اور سرکاری عمارتوں پر قومی پرچم سرنگوں ہیں۔ وزیر اعظم نوازشریف نے غزہ کے متاثرین کے لیے 10لاکھ ڈالر امداد دینے کا بھی اعلان کیا ہے۔ واضح رہے کہ اسلامی جمہوریہ ایران کے بانی حضرت امام خمینی (رح) نے 1979 اگست کے شروع میں 13 رمضان المبارک کو صیہونی حکومت کے چنگل سے فلسطینی سرزمینوں خاص طور پر بیت المقدس کو آزاد کرانے کے لئے جمعۃ الوداع کو عالمی یوم قدس منانے کا اعلان کیا تھا۔

پورے پاکستان ميں ماہ رمضان المبارک کے آخری جمعے، جمعۃ الوداع اور یوم القدس کے موقع پر ملک بھر کے تمام حساس مقامات پر سیکیورٹی کے سخت انتظامات کئے گئے ۔ پاکستان سے ہمارے نمائندے کے مطابق جمعۃ الوداع اور یوم القدس کی تقریبات کے لئے سیکیورٹی سے متعلق حکومت کی جانب سے فول پروف انتظامات کئے گئے اور حساس مقامات اور مساجد پر رینجرز اور پولیس کی اضافی نفری تعینات کی گئی ۔ اسلام آباد پولیس کے مطابق غزہ کے عوام کے ساتھ اظہار یکجہتی کے لئے مختلف سیاسی و مذہبی جماعتوں کی جانب سے یوم القدس کے سلسلے میں مظاہروں اور ریلیوں کے پیش نظر سیکیورٹی پلان کو حتمی شکل دے دی گئی اور وفاقی دارالحکومت میں ساڑھے تین ہزار سے زائد پولیس اہلکار اور افسران ڈیوٹی دے رہے ہیں جبکہ امن و امان برقرار رکھنے کے لئے رینجرز بھی پولیس کی معاونت کررہی ہے ۔ ادھر تحریک انصاف، اہلسنت والجماعت، مجلس وحدت المسلمین سمیت دیگر سیاسی ومذہبی جماعتوں کی جانب سے کراچی، پشاور ، کوئٹہ سمیت دیگر چھوٹے بڑے شہروں میں فلسطینی عوام سے اظہار یکجہتی اور فلسطین پر قابض اسرائیل کے خلاف احتجاجی ریلیاں نکالی گئيں ۔ موصولہ خبروں کے مطابق شارع فیصل پریوم القدس ریلی کی بس پرفائرنگ کے نتیجہ میں تین خواتین سمیت 5 افراد زخمی ہو گئے ،پولیس کے مطابق فائرنگ کا واقعہ شارع فیصل پرفائن ہاؤس کےقریب پیش آیا جس میں 3 خواتین سمیت 5 افراد زخمی ہو گئے ۔ فائرنگ کے واقعے کے بعد بھگدڑ مچ گئی اور شارع فیصل پرٹریفک جام ہو گیا۔

ہندوستان کشمیر میں اکیڈیمی آف آرٹ، کلچر اینڈ لینگویجز کی طرف سے قرآنِ کریم کے نادر و نایاب مخطوطات اور خطاطی کے نادر شاہپاروں کی نمائش کا انعقاد کیا گیا ہے۔ نمایش میں گزشتہ تقریباً آٹھ سو سال کے دوران کشمیر میں کتابت کئے گئے قرآنِ کریم کے نسخے عوامی مشاہدے کے لئے رکھے گئے ہیں، جن میں سے بعض آبِ زر اور زعفران کی روشنائی سے لکھے گئے ہیں۔ نمائش کا افتتاح سابق ڈائریکٹر جنرل کلچر محمد یوسف ٹینگ نے کیا اور اس موقعے پر سرکردہ شہریوں اور فن شناسوں کی بڑی تعداد موجود تھی ۔ نمائش میں نسخہ فتح اللہ ، تفسیر حسینی ، مختلف خطوط میں رقم قرآن مجید، تراجم، تفاسیر اور خطاطی کے نادر نمونے عوامی دلچسپی کا خاص مرکز رہے۔ نمائش کا افتتاح کرتے ہوئے مہمان خصوصی محمد یوسف ٹینگ نے کشمیر میں قرآنی فنون کے مختلف پہلوؤں پر تفصیلی روشنی ڈالی، جن میں خطاطی کے خاص کشمیری قلم میں کتابت کردہ نسخوں ، قرآن کریم کے حاشیوں کی مذہب کاری ، طلا کاری اور جلد بندی شامل ہے ۔ اس موقعے پر اُنہوں نے بتایا کہ سینکڑوں برسوں کی محنت سے حاصل شدہ اس گنج ہائے گران مایہ کے تحفظ اور انہیں آئندہ نسلوں تک لے جانے کے لئے اِس قسم کی نمائشوں کا انعقاد بے حد ضروری ہے ۔ نمائش میں خط غبار کا ایک سکرول بھی رکھا گیا ہے، جس میں قرآن کریم کے 30 پاروں کی انتہائی باریکی لیکن استادانہ انداز سے کتابت کی گئی ہے ۔ نمائش میں بعض بزرگان دین دست مبارک سے کتابت کردہ قرآن کریم کے نمونے بھی رکھے گئے ہیں۔

غزہ کے مختلف علاقوں پر صہیونی فوج کے آج کے وحشیانہ حملوں میں دسیوں فلسطینیوں کی شہادت کے ساتھ، گذشتہ 14 دنوں میں شہید ہونے والے فلسطینیوں کی تعداد 510 ہوگئی ہے۔ الاقصی ٹی وی کی تازہ ترین رپورٹ کے مطابق غزہ اور رفح کے مختلف علاقوں میں غاصب صہیونی حکومت کے فضائی اور توپخانوں کے حملوں میں ابتک 40 سے زیادہ فلسطینی شہید اور دسیوں دیگر زخمی ہوچکے ہیں۔ دوسری جانب گذشتہ روز غزہ کے الشجاعیہ کے علاقے میں غاصب صہیونی حکومت کے وحشیانہ حملے میں شہید ہونے والے فلسطینیوں کی تعداد 120 سے تجاوز کرگئي ہے۔ اس رپورٹ کے مطابق صہیونی حکومت کی وحشیانہ بمباری کے نتیجے میں سینکڑوں فلسطینی خاندان بے گھر ہوچکے ہیں۔ مسلسل 14 ویں روز محصورین غزہ پر بمباری کا سلسلہ جاری ہے، تازہ بمباری کے نتیجے میں 7 کمسن بچوں سمیت 9 افراد شہید ہوگئے جبکہ ایک اور کارروائی میں صیہونی فوج نے سرحد عبور کرنے کا الزام لگاتے ہوئے فائرنگ کر کے مزید 10 فلسطینیوں کو شہید کردیا۔ دوسری جانب فلسطینی وزارت صحت کے مطابق اسرائیلی فوج کی بمباری سے تباہ ہونے والی عمارت کے ملبے سے مزید 16 افراد کی لاشیں نکال لی گئی ہیں اور جاں بحق ہونے والے تمام افراد کا تعلق ایک ہی خاندان سے بتایا جارہا ہے۔ ادھر فلسطینی مزاحمتی گروہوں نے صہیونی حکومت کی جارحیت کے جواب میں صہیونی حکومت کے شہروں تل ابیب، سدیروت، اشدود اور عسقلان پر سیکڑوں راکٹ فائر کیئے ہیں، جس کے نتیجے میں دسیوں صہیونیوں کے زخمی ہونے کی اطلاع ہے۔ تحریک حماس کی فوجی شاخ عزالدین قسام بریگیڈ نے بھی صہیونی حکومت کی فوج کے درجنوں میرکاوائی نامی ٹینکوں تباہ کردیاہے۔ قابل ذکر ہے کہ صہیونی حکومت نےاپنے دسیوں فوجیوں کی ہلاکت کا اعتراف کیا ہے۔

حزب اللہ لبنان کے سربراہ سیدحسن نصراللہ نے کہا ہے کہ لبنان کی اسلامی مزاحمتی تحریک حزب اللہ، فلسطین کی اسلامی مزاحمتی گروہوں کی حمایت کرتی ہے۔ حزب اللہ لبنان کے سربراہ نے حماس کے سیاسی شعبے کے سربراہ خالد مشعل سے ٹیلی فونک گفتگومیں فلسطین کی اسلامی مزاحمتی تنظیموں کی حمایت کا اعلان کرتے ہوئے فلسطینی مجاہدین کی غیرمعمولی استقامت کو سراہا۔ حزب اللہ لبنان کے سربراہ سید حسن نصراللہ نے اس کے ساتھ ہی جہاد اسلامی کے سکریٹری جنرل رمضان عبداللہ کی بھی بھرپور حمایت کااعلان کیا اور کہا کہ حزب اللہ موجودہ صورت حال میں صیہونی حکومت کے مقاصد کوناکام بنانے کےلئۓ فلسطینی گروپوں کے ساتھ ہرقسم کا تعاون کرنے کو تیار ہے۔ حزب اللہ لبنان کے سربراہ نے کہا کہ صیہونی وزیراعظم کو غزہ پٹی پر حملے میں بڑی طاقتوں کی حمایت حاصل ہے تو غزہ کے مظلوم عوام اور فلسطینی جہادی تنظیموں کو لبنانی مزاحمتی گروپوں کی مکمل حمایت حاصل ہے۔

عراق کا صوبہ نجف ان عیسائیوں کو پناہ دینے کے لئے آمادہ ہے کہ جو تکفیری دہشتگردوں کی جانب سے زبردستی اسلام قبول کرنے یا جزیہ ادا کرنے کی دھمکی کے بعد موصل شہر سے فرار کرنے پر مجبور ہوگئے ہیں۔ عراق کی السومریہ نیوز کی رپورٹ کے مطابق صوبے نجف اشرف میں انسانی حقوق کمیٹی کے سربراہ محسن التمیمی نے کہا ہے کہ نجف اشرف کی صوبائي کونسل عراق کے شمالی شہر موصل اور اس کے مضافات سے نقل مکانی کرنے والی عیسائی خاندانوں کا خیرمقدم کرتی ہے اور عیسائی خاندانوں کو اس صوبے میں پناہ دینے کے لئے مکمل طور پر آمادہ ہے۔ واضح رہے کہ دہشتگرد تکفیری گروہ داعش نے موصل شہر اور اس کے اطراف کے علاقوں میں آباد عیسائیوں کو ہفتہ کے دن تک کی مہلت دی تھی کہ وہ اسلام قبول کریں یا پھرجزیہ ادا کریں اور ایسا نہ کرنے کی صورت میں ان کو قتل کردیا جائے گا۔ دہشتگرد گروہ داعش نے اسی طرح اعلان کیا ہے کہ موصل کے عیسائيوں کو موصل سے اپنا مال لے جانے کی اجازت نہیں ہے اور ان کے گھر بھی داعش کے قبضے میں آجائیں گے۔ عیسائیوں کے لئے داعش کے الٹی میٹم کے ساتھ ہی موصل کے عیسائیوں نے اپنا گھر بار چھوڑ دیا ہے اور وہ عراق کے پر امن علاقوں کی طرف نقل مکانی کرنے پر مجبور ہوگئے ہیں۔ اس رپورٹ کے مطابق عراق کی تاریخ میں یہ پہلی مرتبہ ہے کہ عیسائيوں کو زبردستی اسلام قبول کرنے یا جزیہ ادا کرنے کی دھمکی دی گئی ہے۔

اسلامی جمہوریہ ایران کی برّی فوج کے سربراہ نے کہا ہے کہ ملک کی عزت، سلامتی اور توانائی، شہداء کے خون کی برکت سے ہے۔ ارنا کی رپورٹ کے مطابق جنرل احمد رضا پوردستان نے تھران میں فوجی یونیورسٹی میں ہونے والی تقریب میں کہا کہ آج ہمارے بعض ہمسایہ ملکوں میں بدامنی اور داخلی جھڑپوں کا سلسلہ جاری ہے، لیکن شہداء کے خون کی برکت سے ایران، امریکہ کے مقابلے میں پوری طاقت و توانائی سے ڈٹا ہوا ہے اور اپنے حقوق کا دفاع کررہا ہے۔ اسلامی جمہوریہ ایران کی برّی فوج کے سربراہ نے کہا کہ ایک وقت تھا کہ امریکہ، سپر طاقت کے عنوان سے پہچانا جاتا تھا، لیکن شہداء کے خون کی برکت سے دنیا میں امریکہ کی برتری کا خاتمہ ہوگيا اور اگر یہ شہداء نہ ہوتے تو ایران کو یہ عظمت حاصل نہیں ہوتی۔