سماجی علوم کے ادارے ایپسوس نے انجینئرنگ کے ادارے سِزِی کے تعاون سے ایک نیا سروے کیا ہے، جس کے نتائج کے مطابق فرانسیسی صدر ایمانوئل میکرون کی مقبولیت کم ہو کر اپنی کم ترین سطح، یعنی 15 فیصد پر پہنچ گئی ہے۔

ایپسوس کی جانب سے اپنی ویب سائٹ پر شائع کردہ چارٹ کے مطابق، اس سروے میں حصہ لینے والے صرف 15 فیصد فرانسیسی شہریوں نے صدر کی حیثیت سے میکرون کی کارکردگی کی تائید کی، جبکہ 82 فیصد نے ان کے فیصلوں پر عدم اطمینان کا اظہار کیا۔ یہ کمی اس ادارے کے ستمبر 2026ء میں کیے گئے گزشتہ سروے میں ریکارڈ ہونے والی 16 فیصد مقبولیت سے بھی کم ہے۔

فرانس میں عوامی عدم اطمینان صرف صدر تک محدود نہیں ہے، بلکہ فرانسیسی وزیر اعظم سباستین لیکورنو کی کارکردگی کی تائید کرنے والوں کی شرح بھی صرف 22 فیصد ہے۔ اس کے برعکس، سروے میں حصہ لینے والے 69 فیصد افراد نے ان کی کارکردگی کے بارے میں منفی رائے کا اظہار کیا۔

2027ء کے صدارتی انتخابات کے سروے میں مخالفین آگے

2027ء کے صدارتی انتخابات کے ممکنہ امیدواروں کے حوالے سے اس سروے کے نتائج ظاہر کرتے ہیں کہ جماعت نیشنل ریلی کے سربراہ جورڈن بارڈیلا 34 فیصد حمایت کے ساتھ بدستور سرفہرست ہیں۔ ان کے بعد اس جماعت کے پارلیمانی گروپ کی سربراہ مارین لوپن 32 فیصد حمایت کے ساتھ دوسرے نمبر پر ہیں، جبکہ فرانس کے سابق وزیر اعظم ایدوار فیلیپ 20 فیصد ووٹوں کے ساتھ تیسرے نمبر پر ہیں۔

یہ نتائج ادارے اودوکسا۔ماسکاری کے سابقہ سروے سے مطابقت رکھتے ہیں، جسے ٹیلی ویژن نیٹ ورک بی ایف ایم ٹی وی نے شائع کیا تھا۔ اس سروے میں بھی یہ بات سامنے آئی تھی کہ جون 2026 کے اختتام سے میکرون کی مقبولیت میں 7 فیصد پوائنٹس کی کمی کے بعد ان کی مقبولیت تاریخی طور پر اپنی کم ترین سطح پر پہنچ گئی تھی۔ اس سروے میں صرف 18 فیصد شرکاء نے انہیں ایک کامیاب صدر قرار دیا تھا۔

 برطانوی میری ٹائم ٹریڈ آپریشنز ادارے (UKMTO) نے اعلان کیا ہے کہ آبنائے ہرمز سے باہر نکلتے وقت ایک تیل بردار جہاز نامعلوم پروجیکٹائل کی زد میں آ کر متاثر ہوا۔

اس برطانوی ادارے نے بتایا کہ اسے آبنائے ہرمز میں پیش آنے والے ایک واقعے کی اطلاع تاخیر سے موصول ہوئی ہے۔

برطانوی میری ٹائم ٹریڈ آپریشنز ادارے نے کہا کہ ایک تیل بردار جہاز علاقے سے باہر نکل رہا تھا کہ اسے نامعلوم پروجیکٹائل نے نشانہ بنایا۔ جہاز کے عملے کی سلامتی کی تصدیق کر دی گئی ہے، تاہم اس وقت واقعے کے ماحولیاتی اثرات کی شدت واضح نہیں ہے۔ حکام اس معاملے کی تحقیقات کر رہے ہیں۔

بیان میں مزید کہا گیا ہے کہ جہازوں کو احتیاط کے ساتھ آمد و رفت کرنے اور کسی بھی مشتبہ سرگرمی کی اطلاع UKMTO کو دینے کی سفارش کی جاتی ہے۔

جمہوریہ آذربائیجان کے متعدد اسکولوں کے طالبات نے حجاب پہننے والی طالبات پر عائد پابندیوں کے خلاف احتجاج کرتے ہوئے کلاسوں میں حاضر ہونے سے انکار کر دیا ہے۔

باکو شہر کے محکمۂ تعلیم نے اعلان کیا ہے کہ اس نے سرکاری اسکولوں میں نئی شرائط پر عمل درآمد کے طریقۂ کار کی نگرانی شروع کر دی ہے۔

ان اقدامات کو طالبات اور والدین کی تنقید کا سامنا ہے۔ ان کا کہنا ہے کہ یہ ضوابط حجاب پہننے والی لڑکیوں کے تعلیم حاصل کرنے کے حق کو محدود کرتے ہیں۔ جمہوریہ آذربائیجان کے آئین کے مطابق، ریاست عام اور لازمی ثانوی تعلیم مفت فراہم کیے جانے کے حق کی ضمانت دیتی ہے۔

دو اسکولوں بند اور حجاب پہننے والی معلمہ برطرف

میدان ٹی وی کی رپورٹوں اور سوشل میڈیا پر شائع ہونے والی ویڈیوز کے مطابق، باکو کے اسکول نمبر 69 اور ضلع ماسالی کے گاؤں مولااوبا میں واقع بی۔ شیری‌یف سیکنڈری اسکول کی طالبات نے کلاسوں میں حاضر ہونے سے انکار کر دیا۔ انہوں نے مطالبہ کیا کہ حجاب پہننے والی ان کی ہم جماعت طالبات کو دوبارہ اسکول آنے کی اجازت دی جائے۔

ایک اور واقعے میں، میدان ٹی وی کی رپورٹ کے مطابق، باکو کے رچرڈ زورگے سیکنڈری اسکول نمبر 90 میں حجاب پہننے والی ایک معلمہ کو ملازمت سے برطرف کر دیا گیا ہے۔ اس میڈیا ادارے کی جانب سے شائع کی گئی تصاویر میں طالبات کو روتے ہوئے اپنی معلمہ سے لپٹتے دیکھا جا سکتا ہے۔

حجاب کی حمایت میں قید صحافی کی بھوک ہڑتال

قید صحافی پولاد اصلانوف نے بھی اسکولوں کے یونیفارم سے متعلق ان ضوابط میں تبدیلی کے خلاف بھوک ہڑتال شروع کر دی ہے، جن کی منظوری جمہوریہ آذربائیجان کی کابینہ نے 21 ستمبر کو دی تھی۔

خبرمان نیوز ویب سائٹ کے قید مدیر نے اعلان کیا ہے کہ انہوں نے ان پابندیوں کے خلاف جمعرات کے روز بھوک ہڑتال شروع کی۔

ان کی اہلیہ گلمیرا اصلانوا نے فیس بک پر ایک پوسٹ کے ذریعے اس فیصلے کا اعلان کیا اور بتایا کہ اصلانوف کو حراستی مرکز نمبر 15 میں رکھا گیا ہے۔

اصلانوف نے کہا کہ بھوک ہڑتال کا مقصد حجاب پہننے والی طالبات کو اسکولوں میں آنے سے محروم کیے جانے اور حجاب پہننے والی معلمات کے لباس سے متعلق پابندیوں کی جانب عوامی توجہ مبذول کروانا ہے۔ 

انہوں نے یہ بھی کہا کہ ان کے اپنے بچے کے تعلیم حاصل کرنے کے حق کو بھی محدود کیا گیا ہے۔

انہوں نے کہا کہ میں اعلان کرتا ہوں کہ میں نے اپنے بچے اور ان تمام حجاب پہننے والی طالبات کے حقوق کے دفاع کے لیے بھوک ہڑتال شروع کی ہے، جن کے تعلیم حاصل کرنے کے حق کو محدود کر دیا گیا ہے۔ اسی طرح، میں ان تمام حجاب پہننے والی خواتین معلمات کے حقوق کے دفاع کے لیے بھی بھوک ہڑتال کر رہا ہوں، جنہیں تعلیم حاصل کرنے اور حجاب پہننے میں سے کسی ایک کا انتخاب کرنے پر مجبور کیا جا رہا ہے۔

 ایرانی بری فوج کے کمانڈر بریگیڈیئر جنرل علی جہانشاہی نے کہا ہے کہ جنگ رمضان کے دوران ملک بھر میں فوجی یونٹوں کی تعیناتی اور اہلکاروں کی بڑے پیمانے پر نقل و حرکت کے ذریعے ایران پر زمینی حملے کے دشمن کے منصوبے کو ناکام بنایا گیا۔

انہوں نے بتایا کہ فوجی یونٹوں کو ملک کے مختلف علاقوں میں تعینات کیا گیا، جن میں جنوب مغرب سے لے کر مغربی اور مشرقی آذربائیجان کے صوبے، سیستان و بلوچستان اور مکران کا ساحلی علاقہ شامل ہیں۔ ان یونٹوں نے سخت موسمی حالات کے باوجود اپنی ذمہ داریاں انجام دیں۔

جنرل جہانشاہی کے مطابق، دشمن کا خیال تھا کہ فضائی حملوں اور کمانڈروں کو نشانہ بنا کر قتل کرنے سے اس کے حمایت یافتہ گروہوں اور دہشت گرد تنظیموں کے لیے ایران میں داخل ہونے کی راہ ہموار ہوجائے گی۔ تاہم، ایرانی فوج اور سپاہ پاسداران انقلاب کے یونٹوں کی سرحدوں پر تیز رفتار اور وسیع پیمانے پر تعیناتی نے اس منصوبے کو ناکام بنا دیا۔

بری فوج کے کمانڈر نے کہا کہ 2025 کی 12 روزہ جنگ کے بعد ایران کی مسلح افواج نے میدان جنگ کے تجربات کا جائزہ لیا، عملیاتی منصوبوں پر نظرثانی کی، جنگی فارمیشنوں کو ازسرنو منظم کیا اور دفاعی پوزیشنوں کو مضبوط بنایا۔

انہوں نے مزید کہا کہ ممکنہ خطرات کا مقابلہ کرنے کے لیے فوجی اڈوں پر جنگی تیاریوں کی مشقیں کی گئیں اور سرحدی یونٹوں کو تقویت دی گئی۔

جنرل جہانشاہی کے مطابق، بری فوج کسی بھی جارحیت کا مقابلہ کرنے کے لیے تیار ہے۔ اس مقصد کے لیے فوج کے پاس متحرک حملہ آور بریگیڈز، فوری ردعمل دینے والی فورسز، خصوصی یونٹ اور میکانائزڈ فورسز موجود ہیں۔

انہوں نے مزید کہا کہ ایرانی فوج کے اہلکار ملک کی علاقائی سالمیت کا دفاع اپنی ذمہ داری سمجھتے ہیں۔ 1979 کے اسلامی انقلاب کے بعد سے مسلح افواج نے قومی مفادات کے تحفظ اور ملک کی سلامتی کو یقینی بنانے کی ذمہ داری سنبھال رکھی ہے۔

– اسلامی جمہوریہ ایران کی اعلی قومی سلامتی کے سیکریٹری جنرل محسن رضائی نے ایک ٹی وی انٹرویو میں  کہا ہے کہ امریکیوں نے ہماری شرائط کا جواب دے دیا ہے لیکن ہم ان کے جواب کو نا کافی سمجھتے ہیں، اصولی طور پر انہیں چاہئے کہ ابہامات برطرف کریں۔

انھوں نے اس انٹرویو میں ایران کے خلاف امریکی حملے اور جنگ کی ماہیت کے بارے میں پوچھے گئے، سوال کے جواب میں کہا کہ یہ ظالمانہ، شر پسندانہ غیر انسانی اور احمقانہ ترین جنگ تھی۔

 جنرل رضائی نے کہا کہ ٹرمپ حکومت نے آنکھ بند کرکے، اپنی لگام نتن یاہو کو پکڑا دی اور اپنے جاہل وزیر جنگ اور اس وزیر خارجہ کے ساتھ مل کر جس نے وزارت خارجہ کے عہدے کو ایف بی آئی کا عہدہ سمجھ لیا تھا، سوچے سمجھے بغیر ایران کے خلاف جنگ شروع کردی۔  

ایران کی اعلی قومی سلامتی کے سیکریٹری نے کہا کہ وہ سمجھ رہے تھے کہ مختصر مدت میں جنگ ختم ہوجائے گی اور ٹرمپ امریکی تاریخ کے ہیرو بن جائيں گے لیکن آج اسی حماقت کے ساتھ جنگ سے باہر نہیں نکل سکتے، بلکہ آج ضرورت اس بات کی ہے کہ امریکا کے عقل مند لوگ آگے آئيں، ان کا ہاتھ پکڑیں اور انہیں جنگ سے باہر نکالیں ورنہ ان کی حماقت انہیں صحیح طریقے سے جنگ سے باہر نہیں نکلنے دے گی۔

ایران کی اعلی قومی سلامتی کونسل میں رہبر انقلاب اسلامی کے نمائندے اور سیکریٹری جنرل محسن رضائی نے اس سوال کے جواب میں کہ  ممکنہ آئندہ جنگ میں ایران کا جواب کیسا ہوگا؟، کہا کہ امریکی معیشت کی نبض مغربی ایشیا میں ہے۔ اس علاقے میں امریکا کے بڑے قیمتی وسائل موجود ہیں۔ ہم نے ابھی انہیں اپنے اہداف میں نہیں رکھا ہے، لیکن اگر جنگ ہوئی تو وہ کیبل جو امریکا نے بچھائے ہیں اور اس کے وہ ڈیٹا سینٹر اور مصنوعی ذہانت کے مراکز جن پر 2 ہزارارب  ڈالر سے زیادہ کا سرمایہ لگا ہے، وہ سب ہمارے حملوں کی رینج میں ہیں۔

   انھوں نے کہا کہ ہم نے شروع میں ہی اپنی ساری توانائی اور وسائل سے کام نہیں لیا ہے کہ بعد کے مراحل میں ہمارے ہاتھ خالی ہوں۔ اگر آج جنگ ہوئی تو یقینا ہم وسیع ترین منصوبوں کے ساتھ دشمن کا مقابلہ کریں گے۔   

جنرل رضائی نے حالیہ مہینوں میں دشمن کی متعدد شکستوں کا ذکرکیا اور کہا کہ دشمن کو پہلی 12 روزہ جنگ میں سنگین شکست کا سامنا کرنا پڑا ۔ اس کے بعد 40 روزہ جنگ بھی سخت ترین ہزیمت اٹھانی پڑی۔ اس شکست کے بعد اس نے بحری محاصرہ شروع کیا، وہ بھی بے نتیجہ رہا۔

انھوں نے کہا کہ دشمن نے محاصرے اور اقتصادی جنگ کا آغاز کیا ہے۔ اس کو ہر حملے میں شکست ہوئی ہے لیکن ہمارا پروگرام اپنی جگہ موجود ہے۔ ہم نے بہت ہی دقیق حساب کتاب کے ساتھ، اس کے سبھی حملوں کو ناکام بنایا ہے  اور آج اس کے ہر قسم کے حملے کا مقابلہ اور اپنا دفاع کرنے کے لئے پوری طرح تیار ہیں۔   

جنرل محسن رضائی نے تاریخ ایران کے بارے میں امریکی وزیر خارجہ کی باتوں کے بارے میں پوچھے گئے سوال کے جواب میں کہا کہ ہمیں امریکا کے کچھ جاہل اور احمق لوگوں کا سامنا ہے، جنھوں نے نہ تاریخ پڑھی ہے اور نہ ہی ایرانی قوم کو پہچانتے ہیں۔

انھوں نے کہا کہ میں روبیو سے کہنا چاہوں گا کہ تمھارے بڑے ایران آنے کی آرزو کے ساتھ چلے گئے۔ کئی ہزار سال سے ان کی آرزو تھی کہ ایران آئيں، اس پر قبضہ کریں اور ایرانی قوم کو ختم کردیں۔ ایرانی قوم نے ان سب کو شکست دی اور آج  ان کا نام بھی تاریخ میں موجود نہیں ہے لیکن ایرانی قوم عزت و سربلندی کے ساتھ تاریخ میں باقی رہی، آج بھی ہے اور آئندہ بھی رہے گی۔

ایران کی اعلی قومی سلامتی کونسل کے سیکریٹری نے کہا کہ " میں صراحت کے ساتھ کہتا ہوں کہ جتنا زیادہ ہاتھ پاؤں ماروگے، اتنا ہی اس دلدل میں دھنستے جاؤگے۔ نتیجہ اس کے سوا کچھ اور نہیں ہوگا۔

انھوں نے کہا کہ  ہماری تاریخ میں تمھارے لئے بہت اچھے سبق ہیں۔ ایک بار پھر ایرانی قوم کے سامنے گھٹنے ٹیکنے پر مجبور ہوگے اور ملت ایران کی عظمت میں کئی گنا اضافہ ہوگا۔

جنرل محسن رضائی نے سات اکتوبرکے آپریشن طوفان الاقصیٰ کے ایام کی مناسبت سے پوچھے گئے ایک سوال کے جواب میں کہا کہ حماس کے مجاہدین نے اپنے قیدیوں کو آزاد کرانے کے لئے یہ آپریشن انجام دیا تھا۔ اس وقت جو پیغام جاری ہوا، اس میں کہا گیا ہے کہ نتن یاہو کے خلاف اس واقعے کے سلسلے میں غفلت  سے کام لینے کا کیس تیار کیا گیا ہے۔   

انھوں نے کہا کہ اس وقت نتن یاہو اور اسرائیلی حکومت کو پیغام دیا گیا تھا کہ ہمارے مجاہدین کو آزاد کردو ورنہ تمھارے خلاف کارروائیاں کی جائيں گی  اور پھر ہزاروں مظلوم فلسطینی قیدیوں کی رہائی کے لئے  آپریشن کیا گیا۔  

جنرل محسن رضائی نے کہا کہ اسرائیلی حکومت نے انتہائی تشدد، بچوں کے قتل عام، نسل پرستی اور نسل کشی کا ارتکاب کیا۔غزہ میں فلسطینیوں کا جو وسیع تر قتل عام کیا گیا ہے وہ دنیا کے یہودیوں کے لئے اس حدتک ناقابل دفاع ہے کہ کہا جاسکتا ہے کہ نتن یاہو کے اقدامات نے پوری دنیا میں یہودیوں کی عزت وآبرو خاک میں ملادی۔ وہ اقدامات اس حدتک خود یہودیوں کے لئے ناقابل دفاع اور انسانیت مخالف ہیں۔  

انھوں نے کہا کہ صیہونیوں کا یہ تشدد آمیز اور انسانیت مخالف چہرہ، جو گزشتہ 70 برس کے دوران محدود دائرے میں  ہی پہچانا گیا تھا، نتن یاہو حکومت  کے وحشیانہ جرائم ایسے ہیں کہ اب وسیع ترین سطح پر یہ حقیقت بے نقاب ہوگئی ۔   

اسلامی جمہوریہ ایران کی اعلی قومی سلامتی کونسل کے سیکریٹری نے مذاکرات اور ڈپلومیسی کی تازہ ترین صورتحال کے بارے میں پوچھے گئے سوال کے جواب میں کہا کہ ہماری ڈپلومیسی تبدیل ہوگئی ہے اور اب ہم ماضی کی ڈپلومیسی کی طرف واپس نہیں جائيں گے۔ اس لئے کہ ہم نے مذاکرات کے تین دور انجام دیئے اور امریکا نے ہر دور کے مذاکرات کے بیچ میں ایران پر حملہ کیا۔ بنابریں اب ہم ماضی کی ڈپلومیسی کی طرف ہرگز واپس نہیں جائيں گے۔ جو شخص خود سمجھوتے پر دستخط کرتا ہے اور پھر اس سے نکل جاتا ہے، اس کے ساتھ دوسری قسم کی ڈپلومیسی کے ساتھ ہی پیش آنے کی ضرورت ہے۔ البتہ ہم نے کبھی بھی ڈپلومیسی ترک نہیں کی ہے، آئندہ بھی ترک نہیں کریں گے لیکن ہماری ڈپلومیسی بدل گئی ہے۔   

 پاکستان کے وزیر اعظم میاں شہباز شریف نے پاکستان اور ایران کے روابط کے استحکام کو نظیر بتایا ہے  اور کہا ہے کہ دونوں ملکوں کے روابط کی تقویت کا یہ عمل جاری رہے گا۔

انھوں نے آج اسلام آباد میں اپنی کابینہ کی نشست میں مشرق وسطیٰ کے تغیرات، آبنائے ہرمز  اور آبنائے باب المندب  نیز یمن اور سعودی عرب کے مسائل میں اپنے ملک کے موقف کی وضاحت کی۔  

میاں شہباز شریف نے ایران اور امریکا کے درمیان پاکستان کی ثالثی کے بارے میں کہا کہ اسلام آباد نے اس سلسلے میں اپنی صادقانہ کوششیں جاری رکھی ہیں اور دیگر برادر ملکوں کی مساعی کا خیر مقدم کرتا ہے۔

انھوں ایران کے ساتھ پاکستان کے روابط کو دیرینہ اور برادرانہ قرار دیا اور کہا کہ  ایران کے ساتھ ہمارے ملک کے  روابط کے فروغ کا موجودہ عمل غیر معمولی اور بے نظیر ہے اوراسلام آباد تہران کے ساتھ روابط کے استحکام کا یہ عمل جاری رکھے گا۔  

میاں شہباز شریف نے کہا کہ دونوں ملکوں کے وزرائے خارجہ کے درمیان مستقل طور پر رابطہ برقرار ہے اور فیلڈ عاصم منیر بھی امن واستحکام کے مشترکہ ہدف میں اپنا کردار ادا کررہے ہیں۔

اسلامی جمہہوریہ ایران کی فوج کے ڈپٹی کوآرڈینیٹر ایڈمیرل حبیب اللہ سیاری نے کہا ہے کہ ہم نے دشمن کے بحری جہازوں پر حملے کئے ہیں اور ضرورت پڑنے پر اس کے بعد بھی حملے کریں گے۔

 انھوں نے کہا کہ ہمارے ہاتھ پیر بندھے نہیں ہیں اور ہماری توانائیاں آج دنیا میں زباں زد خاص و عام ہیں۔

ایڈمیرل سیاری نے کہا کہ ہم نے محکم اور ڈٹ کے دفاع کیا ہے اور کررہے ہیں اور جہاں بھی ضرورت محسوس ہوئی دشمن پر وار لگائيں گے۔

انھوں نے کہا کہ ایرانی قوم نے دشمنوں پر ثابت کردیا ہے کہ یہ قوم ان کے مقابلے پر ڈٹی ہوئی ہے اور اپنی ارضی سالمیت، انقلاب ، نیز اپنے شرف اور ناموس کی حفاظت میں مشکلات برداشت کرنے والی قوم ہے۔

مہر خبررساں ایجنسی، دفاعی ڈیسک؛ امریکہ اور صہیونی حکومت کی جانب سے گذشتہ سال سے اب تک دو مرتبہ جنگ مسلط کی گئی۔ ایران پر جارحیت کے کئی اہداف تھے جن کو پیش نظر رکھتے ہوئے دشمن نے انسانی اقدار اور بین الاقوامی قوانین کو روند ڈالا تاہم اس کے باوجود دشمن جنگ میں بری طرح شکست سے دو چار ہورہا ہے۔ جدید ترین ٹیکنالوجی اور مہلک ترین ہتھیاروں سے لیس ہونے کے باوجود امریکی اور صہیونی افواج ایران کے خلاف قابل ذکر کارکردگی دکھانے میں ناکام رہی۔ اس سے دنیا میں نئی بحث چھڑ گئی ہے کہ ایران اس جنگ میں کیوں اور کیسے فاتح بن رہا ہے؟

جنگ میں فتح کا مطلب صرف یہ نہیں کہ کس کے پاس زیادہ ہتھیار یا طاقتور فوج ہے، بلکہ اصل سوال یہ ہے کہ کون فریق اپنی مرضی دوسرے پر مسلط کرنے اور اسے اپنے مقاصد کے حصول سے روکنے میں کامیاب ہوتا ہے۔ اسی تناظر میں تہران امریکہ اور اسرائیل کے مقابلے میں مزاحمت، حملوں کا جواب دینے اور دشمن کے لیے جنگ جاری رکھنے کی قیمت بڑھانے کو کامیابی کا حصہ سمجھتا ہے۔

امریکہ اور اسرائیل نے ایران کے خلاف فوجی اور تکنیکی برتری پر انحصار کیا، لیکن جدید ہتھیاروں کی موجودگی جنگ کے نتیجے کا فیصلہ نہیں کرتی۔ اگر کوئی طاقتور فوج وسیع حملوں کے باوجود مخالف فریق کو پسپائی پر مجبور نہ کرسکے تو محض اپنی عسکری صلاحیت کی بنیاد پر فتح کا دعویٰ نہیں کرسکتی۔

فوجی برتری فتح کی ضمانت نہیں

امریکہ طویل عرصے سے اپنی فوجی برتری کو دوسرے ممالک پر دباؤ ڈالنے کے لیے استعمال کرتا آیا ہے، لیکن گزشتہ جنگوں کے تجربات سے ظاہر ہوتا ہے کہ فضائی طاقت، جدید ہتھیار اور بھاری فوجی بجٹ ہمیشہ سیاسی کامیابی کی ضمانت نہیں بنتے۔

ایران کے معاملے میں بھی اصل سوال یہ نہیں کہ امریکی اور اسرائیلی حملوں سے کتنا نقصان ہوتا ہے، بلکہ یہ ہے کہ آیا ان حملوں کے ذریعے تہران کو واشنگٹن کے مطالبات تسلیم کرنے پر مجبور کیا جاسکتا ہے یا نہیں۔

گذشتہ کئی دہائیوں سے جاری پابندیوں، فوجی دھمکیوں اور سیاسی دباؤ کے باوجود اپنی پالیسی برقرار رکھنا اس بات کی علامت ہے کہ بیرونی دباؤ لازماً تسلیم و اطاعت پر منتج نہیں ہوتا۔ اسی لیے تہران اپنی مزاحمت اور جوابی کارروائی کی صلاحیت برقرار رکھنے کو اہم سمجھتا ہے۔

امریکہ کے لیے جنگ مہنگی بنانے کی حکمت عملی

ایران کی حکمت عملی کا ایک اہم پہلو میدان جنگ کو امریکہ اور اسرائیل کے لیے مہنگا اور غیر یقینی بنانا ہے۔ امریکی فوج بعض شعبوں میں برتری رکھتی ہے، لیکن اس برتری کو میدان جنگ میں برقرار رکھنا اور اسے سیاسی مقاصد کے حصول میں تبدیل کرنا دو مختلف معاملات ہیں۔

ایران کی میزائل اور ڈرون صلاحیتوں اور حملوں کا جواب دینے کی استعداد نے امریکی اور اسرائیلی فوجی منصوبہ بندی کو متاثر کیا ہے۔ اس صورت حال میں مخالف فریق کو اپنی افواج اور تنصیبات کے تحفظ کے لیے مزید وسائل مختص کرنا پڑتے ہیں، جبکہ جنگ کے پھیلاؤ کا خطرہ بھی بڑھ جاتا ہے۔ جنگ کے اخراجات صرف فوجی کارروائیوں تک محدود نہیں رہتے، بلکہ مالی بوجھ، خطے میں تعینات امریکی افواج پر دباؤ، اتحادیوں کی تشویش اور سیاسی اثرات بھی امریکی فیصلوں پر اثر انداز ہوتے ہیں۔

ایران کی حکمت عملی یہ ہے کہ جنگ جاری رکھنے کی قیمت بڑھا کر واشنگٹن کو اپنی پالیسی پر نظرثانی کرنے پر مجبور کیا جائے۔ تاہم، اخراجات میں اضافہ بذات خود حتمی نتیجے کا فیصلہ نہیں کرتا؛ اس کی اہمیت تب بڑھتی ہے جب وہ امریکی قیادت کو اپنے اہداف پر نظرثانی پر آمادہ کرے۔

آبنائے ہرمز؛ ایران کا اہم ترین جغرافیائی ہتھیار

ایران کی اہم تزویراتی طاقتوں میں آبنائے ہرمز کے قریب اس کا جغرافیائی محل وقوع بھی شامل ہے۔ عالمی توانائی کی تجارت کے لیے اہم اس گزرگاہ میں کسی بھی قسم کی رکاوٹ تیل اور گیس کی منڈیوں کو متاثر کرسکتی ہے اور توانائی درآمد کرنے والے ممالک کی تشویش بڑھا سکتی ہے۔

آبنائے ہرمز کی اہمیت صرف خطے تک محدود نہیں، بلکہ دنیا کی کئی بڑی معیشتیں اس راستے سے توانائی کی مستحکم ترسیل پر انحصار کرتی ہیں۔ چنانچہ یہاں کشیدگی میں اضافہ ایک فوجی تنازعے کو وسیع اقتصادی اور بین الاقوامی بحران میں تبدیل کرسکتا ہے۔

اس صورت حال میں امریکہ کو میدان جنگ کے علاوہ عالمی منڈیوں، توانائی کی قیمتوں اور اپنے اتحادیوں کے مفادات کو بھی مدنظر رکھنا پڑتا ہے۔ خطے کے ممالک بھی ایسے بحران کے تسلسل سے متاثر ہوسکتے ہیں جو ان کی توانائی کی سلامتی اور معیشت کے لیے خطرہ بن جائے۔

یوں آبنائے ہرمز محض ایک سمندری گزرگاہ نہیں، بلکہ ایک تزویراتی مقام ہے جو بڑی طاقتوں کے فیصلوں پر اثر انداز ہوسکتا ہے۔ تاہم، اس صلاحیت کے عملی اثرات کا انحصار میدان جنگ کی صورت حال، دوسرے ممالک کے ردعمل اور توانائی کی عالمی منڈیوں پر بھی ہے۔

پابندیاں ایران کو جھکانے میں ناکام

امریکہ نے ایران پر دباؤ ڈالنے کے لیے تیل کی تجارت پر پابندیاں، مالی لین دین میں رکاوٹیں اور بیرونی تجارت کو محدود کرنے جیسے اقدامات کیے ہیں۔ ان کا مقصد ایران کے لیے مزاحمت کی قیمت بڑھانا اور اسے امریکی مطالبات تسلیم کرنے پر مجبور کرنا رہا ہے، تاہم ایران نے اپنی آزادانہ پالیسی برقرار رکھی ہے۔ اس کا مطلب یہ نہیں کہ پابندیاں بے اثر رہی ہیں یا ایران کو اقتصادی مشکلات کا سامنا نہیں، بلکہ یہ ظاہر کرتا ہے کہ معاشی دباؤ اور سیاسی فیصلوں میں تبدیلی کے درمیان کوئی یقینی تعلق نہیں۔ طویل پابندیوں کے باوجود ملک اپنے بنیادی سیاسی فیصلوں پر قائم رہتا ہے تو اسے امریکی دباؤ کی مکمل کامیابی قرار نہیں دیا جاسکتا۔

یہی منطق فوجی کارروائیوں پر بھی لاگو ہوتی ہے۔ اگر حملوں کا مقصد ایران کو واشنگٹن کے مطالبات تسلیم کرنے پر مجبور کرنا ہے تو محض نقصان پہنچانا کافی نہیں ہوگا۔ اصل کامیابی تب ہوگی جب فوجی دباؤ ایران کے سیاسی طرزعمل میں بنیادی تبدیلی لاسکے۔

داخلی استحکام کی اہمیت

کسی بھی جنگ میں فوجی طاقت کے ساتھ سیاسی استحکام، سماجی ہم آہنگی اور ملک چلانے کی صلاحیت بھی اہم کردار ادا کرتی ہے۔ ایران پر بیرونی دباؤ کا ایک مقصد جنگ اور پابندیوں کے اخراجات کو داخلی بے اطمینانی میں تبدیل کرنا اور ملکی فیصلہ سازی کو متاثر کرنا ہے۔ اس کے مقابلے میں تہران داخلی استحکام برقرار رکھنے اور دشمن کے سیاسی اہداف ناکام بنانے میں کامیاب رہا ہے۔ داخلی استحکام کا مطلب عوامی مشکلات یا جنگ کے اخراجات کو نظرانداز کرنا نہیں۔ اقتصادی مسائل کا انتظام، عوامی ضروریات پوری کرنا اور اعتماد برقرار رکھنا بھی ملک کی مزاحمت جاری رکھنے کی صلاحیت کے لیے اہم ہے۔

جنگ اور علاقائی ممالک پر اثرات

ایران اور امریکہ کے درمیان جنگ کے اثرات صرف دونوں ممالک تک محدود نہیں رہے، بلکہ خطے کے دوسرے ممالک بھی اس کے سکیورٹی اور اقتصادی نتائج سے متاثر ہوئے ہیں۔ علاقائی ممالک میں امریکی فوجی اڈوں اور تنصیبات کی موجودگی سے ان ممالک کو جنگ کے پھیلاؤ کے ممکنہ خطرات کا سامنا کرنا پڑا ہے۔ ان حالات میں ان حکومتوں کو امریکہ کے ساتھ اپنے سکیورٹی تعلقات اور جنگ کے ممکنہ نقصانات کے درمیان توازن قائم کرنا پڑا ہے۔ اگر امریکی اتحادیوں کو محسوس ہو کہ جنگ کا تسلسل ان کی سلامتی اور معیشت کے لیے خطرہ بن رہا ہے تو وہ واشنگٹن پر بحران محدود کرنے اور اپنی حکمت عملی تبدیل کرنے کے لیے دباؤ ڈال سکتے ہیں۔

اس طرح ایران کے خلاف جنگ کے علاقائی اخراجات امریکہ کے لیے ایک اضافی مسئلہ بن سکتے ہیں۔ واشنگٹن کو اپنے فوجی اہداف کے ساتھ اتحادیوں کے خدشات اور خطے میں اپنے اثر و رسوخ پر ممکنہ اثرات کو بھی مدنظر رکھنا پڑتا ہے۔

ایران کی فتح کا معیار کیا ہے؟

جنگ کے نتیجے کا جائزہ لیتے وقت فوجی کامیابی اور سیاسی مقاصد کے حصول میں فرق کرنا ضروری ہے۔ کوئی فریق بعض فوجی کارروائیوں میں برتری حاصل کرنے کے باوجود اپنے بنیادی سیاسی اہداف حاصل کرنے میں ناکام رہ سکتا ہے۔ اسی طرح دباؤ کے مقابلے میں ڈٹے رہنے والے فریق کو مکمل فوجی فاتح قرار دینا بھی ضروری نہیں، لیکن وہ دشمن کو اپنے مقاصد حاصل کرنے سے روک سکتا ہے۔

ایران کی حکمت عملی کو چند بنیادی نکات میں سمیٹا جاسکتا ہے: جوابی کارروائی کی صلاحیت برقرار رکھنا، امریکی مطالبات مسلط ہونے سے روکنا، جنگ کے اخراجات بڑھانا، جغرافیائی اور علاقائی اہمیت سے فائدہ اٹھانا اور داخلی استحکام برقرار رکھنا۔

اس نقطہ نظر کے مطابق، اگر امریکہ اپنی فوجی برتری کے باوجود ایران کو اپنے مطالبات تسلیم کرنے پر مجبور نہیں کرسکتا تو اسے اپنی حکمت عملی پر نظرثانی کرنا پڑسکتی ہے۔ ایسی صورت حال اس بات کی مثال ہوگی کہ فوجی برتری لازماً سیاسی مقاصد حاصل کرنے کے لیے کافی نہیں، تاہم ان صلاحیتوں کو سیاسی کامیابی میں تبدیل کرنے کا انحصار مزاحمت جاری رکھنے، جنگ کے اخراجات سنبھالنے، علاقائی صورت حال اور مخالف فریق کے فیصلوں پر ہوگا۔ کوئی حکمت عملی حتمی نتیجے کی ضمانت نہیں دیتی۔

طاقت کی نہیں، ارادوں کی جنگ

آخرکار ایران اور امریکہ کے درمیان جنگ کا معاملہ صرف میزائلوں، طیاروں یا فوجی سازوسامان کی تعداد تک محدود نہیں، بلکہ اصل سوال یہ ہے کہ کون فریق اپنے مقاصد حاصل کرتا ہے اور کسے اپنے مطالبات سے پیچھے ہٹنا پڑتا ہے۔

اسلامی جمہوریہ ایران کے نزدیک فتح اس وقت معنی رکھتی ہے جب وہ فوجی اور اقتصادی دباؤ کے باوجود اپنے فیصلے خود کرنے کی آزادی برقرار رکھے اور امریکہ کو اپنی مرضی مسلط کرنے سے روک دے۔ اس تناظر میں جوابی کارروائی کی صلاحیت، ایران کا تزویراتی محل وقوع اور جنگ کے اخراجات میں اضافہ واشنگٹن کے حساب کتاب کو متاثر کرنے والے اہم عوامل ہیں۔

اسی لیے جنگ کے نتیجے کا تعین صرف پہنچنے والے نقصان یا کسی ایک فریق کی فوجی برتری سے نہیں کیا جاسکتا۔ حتمی معیار یہ ہے کہ جنگ کے ذریعے کس کے سیاسی مقاصد حاصل ہوئے۔

اگر امریکہ اور اسرائیل کا مقصد ایران کو پسپائی پر مجبور کرنا ہو، لیکن تہران دباؤ کے باوجود اپنے بنیادی فیصلوں پر قائم رہے تو یہ ایران کی ایک تزویراتی کامیابی ہے۔ اس تصور میں فتح کا مطلب دشمن کی مکمل فوجی شکست نہیں، بلکہ اس کے مقاصد ناکام بنانا اور اسے اپنی طاقت کی حدود تسلیم کرنے پر مجبور کرنا ہے۔