خاتم الانبیا سینٹرل ڈیفنس ہیڈکوارٹر کے ترجمان نے امریکی صدر ڈونلڈ ٹرمپ کی جانب سے ایران کے پلوں، پاور پلانٹس اور توانائی کے بنیادی ڈھانچے کو تباہ کرنے کی دھمکیوں پر سخت انتباہ کرتے ہوئے کہا ہے کہ اگر امریکہ نے ان دھمکیوں پر عمل کیا تو اس کے سنگین نتائج برآمد ہوں گے۔

کرنل ذوالفقاری نے واضح کیا کہ ایران کی مسلح افواج پوری قوت کے ساتھ جواب دینے کی صلاحیت رکھتی ہیں۔ کسی بھی امریکی حملے کی صورت میں نہ صرف امریکہ اور اسرائیل کے تمام اقتصادی، توانائی اور ایندھن سے متعلق اثاثے خطے میں نشانہ بنائے جائیں گے بلکہ اس سے بھی زیادہ اہم اور وسیع مراکز کو شدید اور دندان شکن حملوں کا سامنا کرنا پڑے گا۔

ترجمان نے خطے کے ممالک کو بھی خبردار کیا کہ اگر وہ نقصان سے بچنا چاہتے ہیں تو انہیں فوری طور پر اپنے ممالک میں موجود امریکی فوجی اڈوں کو بند اور امریکی فورسز کو نکلنے پر مجبور کرنا ہوگا۔ امریکی اڈوں کی موجودگی ان ملکوں کو براہ راست خطرے میں ڈال رہی ہے۔

بین الاقوامی خبر رساں اداروں کے مطابق امریکہ کو اپنے میزائل ذخائر میں کمی کا سامنا ہے۔

بلومبرگ کی رپورٹ کے مطابق، امریکہ نے جاپان کو آگاہ کیا ہے کہ وہ 2.35 ارب ڈالر کے 400 'ٹام ہاک' کروز میزائلوں کی فراہمی وقت پر نہیں کر سکے گا۔ اس تاخیر کی بڑی وجہ یہ ہے کہ امریکہ اپنے میزائلوں کا ایک بڑا حصہ موجودہ جنگ کے دوران استعمال کر چکا ہے، جس کی وجہ سے اب وہ دوسرے ممالک کے آرڈرز پورے کرنے کی صلاحیت نہیں رکھتا۔

دوسری جانب اسرائیلی فوج نے حزب اللہ کو غیر مسلح کرنے کے دعوے سے پسپائی اختیار کر لی ہے۔

اسرائیل کے اخبار ہآرٹز نے صہیونی فوج کے حوالے سے کہا ہے کہ اسرائیلی فوج کبھی بھی حزب اللہ کو غیر مسلح کرنے میں کامیاب نہیں ہو سکتی، کیونکہ اس مقصد کے لیے پورے لبنان پر قبضہ کرنا پڑے گا جو کہ اس جنگ کا ہدف ہی نہیں ہے۔

دراین اثناء اسرائیل پر ایران اور مقاومتی محاذ کے حملے جاری ہیں۔ اسرائیلی میڈیا نے ایران کے حالیہ میزائل حملے کے بعد ہونے والے نقصانات کی تصدیق کی ہے۔

رپورٹ کے مطابق، تل ابیب کے 9 مختلف علاقوں میں ایرانی میزائلوں کے ٹکڑے گرے ہیں جس سے عمارتوں اور تنصیبات کو نقصان پہنچا۔

مقامی میڈیا نے اعتراف کیا ہے کہ اسرائیلی فضائی دفاعی نظام ان میزائلوں کو روکنے میں مکمل طور پر ناکام رہا، جس کے بعد اب مقبوضہ علاقوں میں شدید خوف اور اضطراب پایا جاتا ہے۔

چین کی وزارت خارجہ کی ترجمان ماؤ ننگ ایران کی بنیادی تنصیبات پر امریکی- صیہونی حملوں کی مذمت کرتے ہوئے کہا کہ ایران کو کسی بھی طرح کا فوجی دباؤ ڈال کر گھٹنے ٹیکنے پر مجبور نہیں کیا جا سکتا ہے۔

 بین الاقوامی حقوق کے امریکی ماہرین کی بڑی تعداد نے ایک کھلے خط میں اعلان کیا ہے کہ ایران پر امریکی جارحیت جنگی جرم کے مترادف ہے۔

 نائب وزیر نقل و حمل ہوشنگ بازوند نے ایران کے کرج شہر میں واقع B1 پل کے بارے میں بتایا کہ اس پل پر تعمیرات کا آخری مرحلہ جاری تھا اور ابھی افتتاح ہوا ہی نہیں تھا۔

سپاہ پاسداران انقلاب اسلامی کے شعبہ تعلقات عامہ نے اعلان کیا ہے کہ بحری دستوں نے آج سحر کے وقت وعدۂ صادق 4 کے 91ویں مرحلے میں امریکہ اور صہیونی دہشت گردوں سے وابستہ فوجی و بنیادی ڈھانچے کے مراکز کو جنوبی خلیج فارس کے ممالک میں بڑے پیمانے پر میزائل اور ڈرون حملوں کا نشانہ بنایا ہے۔

سپاہ کے مطابق یہ کارروائی مبارک رمز "یا صادِقاً لٰا یُخلِفُ" کے ساتھ انجام دی گئی اور اسے انجینئروں اور جہاد کرنے والوں کے نام منسوب کیا گیا۔

بیان میں کہا گیا ہے کہ اس کارروائی کے دوران دشمن کے فوجی اور انفراسٹرکچر اہداف پر بڑی تعداد میں قدیر بیلسٹک اور کروز میزائلوں کے ساتھ ساتھ تباہ کن ڈرونز کے ذریعے شدید حملہ کیا گیا۔

سپاہ کے بیان کے مطابق اس آپریشن میں شمالی بحر ہند میں موجود امریکی جارح بحری بیڑے آبراہام لنکن کو بھی نشانہ بنایا گیا، جہاں اس پر قدیر 380 کے 4 کروز میزائل داغے گئے۔

سپاہ نے مزید بتایا کہ اس کارروائی کے دوسرے مرحلے میں امارات میں دشمن کے ایک اڈے کے باہر موجود امریکی جنگی طیاروں کے پائلٹوں اور فلائٹ انجینئروں کے خفیہ ٹھکانے کو بیلسٹک میزائلوں کے ذریعے انتہائی درستگی سے نشانہ بنایا گیا۔

بیان کے مطابق زمینی اطلاعات اور ایمبولینسوں کی بڑے پیمانے پر آمد و رفت سے ظاہر ہوتا ہے کہ اس حملے میں ہلاکتوں اور زخمیوں کی تعداد زیادہ ہے۔

سپاہ پاسداران نے کہا ہے کہ اگلے مرحلے میں امریکی MQ-1 ڈرون یونٹ کے خلاف کویت کے علی السالم اڈے پر بھی شدید حملہ کیا گیا۔

سپاہ نے واضح کیا ہے کہ آبنائے ہرمز میں آمد و رفت اس کے بحری نظاموں کی مسلسل نگرانی میں ہے اور دشمن کی معمولی سی حرکت بھی اللہ کے فضل سے سپاہ کے جوانوں کے فیصلہ کن ردعمل کا سبب بنے گی۔

بیان میں مزید کہا گیا کہ آبنائے ہرمز میں آمد و رفت کی صورتحال میں پیدا ہونے والی بے امنی، امریکہ کی جارحانہ اور دہشت گردانہ کارروائیوں کا نتیجہ ہے۔

 سپاہ پاسداران انقلاب اسلامی نے اعلان کیا ہے کہ فضائی دفاعی دستوں نے وسطی ایران کی فضاؤں میں امریکی جدید ترین جنگی طیارے ایف-35 کو تباہ کر دیا ہے۔

تفصیلات کے مطابق سپاہ پاسداران نے آج جمعہ کو جاری بیان میں بتایا کہ تباہ ہونے والا جنگی طیارہ امریکی اسکواڈرن لاک ہیڈ۔ مارٹن سے تعلق رکھتا تھا، جسے وسطی ایران میں سپاہ کے جدید دفاعی نظام کے ذریعے نشانہ بنایا گیا۔

سپاہ کے بیان میں کہا گیا ہے کہ مذکورہ جنگی طیارہ زمین پر گر مکمل تباہ ہوگیا۔

بیان کے مطابق گزشتہ 12 گھنٹوں کے دوران یہ دوسرا امریکی جنگی طیارہ ہے جسے سپاہ کے فضائی دفاعی نظام نے کامیابی کے ساتھ مار گرایا ہے۔

سپاہ پاسداران نے مزید بتایا کہ جنگی طیارہ نشانہ بننے کے بعد شدید دھماکے کے باعث مکمل طور پر بکھر گیا، اسی لیے پائلٹ کے انجام کے بارے میں کوئی اطلاع موجود نہیں۔ دھماکے کی شدت کے باعث پائلٹ کے طیارے سے نکلنے کا امکان بھی کم دکھائی دیتا ہے۔

آج تہران میں میں بھی شہید تنگسیری اور جنگ رمضان کے دیگر شہداء کی مشترکہ تشییع جنازہ منعقد ہوئی، جو میدان انقلاب اسلامی سے معراج شہداء تک جاری رہی۔

عوام نے بھرپور اور جوش و جذبے سے شرکت کرتے ہوئے رہبر معظم کے ساتھ تجدید عہد کیا اور شہداء، بالخصوص امت کے شہید رہبر کے مشن سے اپنی وابستگی کا اظہار کیا۔

شرکاء کی بڑی تعداد نے شہداء کے اہل خانہ کے غم میں شریک ہو کر ان کو تسلی دی اور ساتھ ہی دشمنوں کے مقابلے میں ایرانی قوم کی استقامت، یکجہتی اور مضبوطی کا پیغام بھی دیا۔