ایران کی اعلی قومی کونسل نے ایک بیان جاری کرکے اعلان کیا ہے کہ آج رات سے لبنان سمیت سبھی محاذوں پر جنگ بند ہورہی ہے اور ایران کا بحری محاصرہ بھی فوری طور پر ختم ہوجائے گا۔

ایران کی اعلی قومی سلامتی کونسل کے بیان کا متن مندرجہ ذیل ہے:

 بسم اللہ الرحمن الرحیم

  ایرانی عوام کو اطلاع دی جاتی ہے کہ:

   اسلامی جمہوریہ ایران نے اپنے شہید رہبر کی قیادت کے سائے میں، امریکی صیہونی دشمن پر اپنی برتری مکمل کرلی اورنظام کی اعلی قیادت(حفظہ اللہ) کی تدابیر، عوام کی حمایت اورسپاہیان اسلام کی مجاہدانہ مساعی کے نتیجے میں، چند مہینے کے دشوار اور انتھک مذاکرات کے بعد، جنگ کے خاتمے کے مذاکرات (اسلام آباد مذاکرات) کے تعلق سے، مفاہتی یادداشت کے متن کو اتوار 24 جون کی رات آخری شکل  دے دی۔  

انجام پانے والے اتفاق رائے کے مطابق آج رات سے لبنان سمیت تمام محاذوں پر جنگ مستقل طور پر ختم ہورہی ہے اورایران کا بحری محاصرہ بھی بلا تاخیر مکمل طور پر ختم ہوجائےگا۔

  مفاہمتی یاد داشت پر جمعہ 19 جون کو دستخط ہوں گے۔   
 مکمل سمجھوتے کے مذاکرات کا انحصار، مفاہمتی یاد داشت کے مطابق، فریق مقابلے کے وعدوں پر عمل درآمد پر ہوگا۔

 اسلامی جمہوریہ ایران پاکستان اور حکومت قطر کی مساعی کی قدردانی کرتا ہے۔    
  والسلام علیکم ورحمت اللہ وبرکاتہ

سیکریٹریٹ اعلی قومی سلامتی کونسل

 پاکستان کے نائب وزیر اعظم اور وزیر خارجہ سینیٹر اسحاق ڈار نے  ایران امریکا سمجھوتے پر اتفاق کا خیر مقدم کیا ہے۔

 انھوں نے مابقی مسائل کے حل کے لئے مذاکرات جاری رہنے کی خبر دیتے ہوئے، کہا کہ اسلام آباد معاہدے کے استحکام کے لئے کی جانے والی ہر کوشش کی حمایت کرے گا۔

 سینیٹراسحاق ڈار نے کہا کہ یہ پیشرفت، تصادم کے بجائے گفتگو کے انتخاب کے لئے دوست ملکوں کے اجتماعی عزم اور    پائیدار سفارتی افہام و تفہیم کی قوت کا ثبوت ہے۔

مسجد مقدس جمکران کے متولی حجت الاسلام والمسلمین اجاق نژاد نے مسجد جمکران کے اجلاس ہال میں جنگ رمضان کے شہداء کے خاندانوں کے ساتھ ملاقات کی۔

اس ملاقات میں متولی مقدس مسجد جمکران نے شہداء کو خراج تحسین پیش کرتے ہوئے کہا: شہداء کے خاندانوں کا احترام کرنا اسلامی معاشرے کے اہم ترین فرائض میں سے ہے۔ آج ہم سب پر فرض ہے کہ شہداء کی یاد کو زندہ رکھتے ہوئے، ان کی وصیتوں کو پھیلاتے ہوئے، ان کی زندگی کو بیان کرتے ہوئے اور ان کے اہداف کو واضح کرتے ہوئے، شہداء کے نورانی راستے کو آنے والی نسلوں تک پہنچائیں۔

انہوں نے ثقافتِ اسلامی میں شہداء کے بلند مقام کی طرف اشارہ کرتے ہوئے کہا: شہداء صرف ماضی سے تعلق نہیں رکھتے بلکہ وہ آج بھی ہماری زندگی میں موجود ہیں، ہمارے اعمال پر نظر رکھتے ہیں اور دینی تعلیمات کے مطابق ان کی زندگی پروردگار کے ہاں جاری ہے۔

حجت الاسلام والمسلمین اجاق نژاد نے دفاع مقدس کے دوران مجاہدین اور دشمن کے ہاتھوں آزادی پانے والے افراد کو یاد کرتے ہوئے کہا: حضرت ولی عصر عجل اللہ تعالی فرجہ الشریف سے توسل مشکلات سے عبور کرنے اور مشکل حالات میں حوصلہ برقرار رکھنے میں انتہائی کارساز ہے۔ امام زمانہ عجل اللہ تعالی فرجہ الشریف کے ساتھ ارتباط پیدا کرنے سے انسان کو حقیقی سکون ملتا ہے اور شہداء کے خاندان پر تو امام زمانہ عجل اللہ تعالی فرجہ الشریف کی خاص عنائت و نظر و کرم ہوتی ہے۔

قابل ذکر ہے کہ اس ملاقات کے دوران شہداء کے خاندان کے بعض افراد نے بھی اپنے شہداء کی بعض داستانیں، واقعات اور حسین یادوں کو بیان کیا۔

 اتحادِ امت فورم کے زیرِ اہتمام منعقدہ پریس کانفرنس میں علامہ سید جواد نقوی، علامہ محمد امین شہیدی اور علامہ احمد اقبال رضوی نے خطاب کیا۔ اس موقع پر مرکزی صدر آئی ایس او سید محمد امین شیرازی، مولانا ظہیر کربلائی، لعل مہدی خان سمیت مختلف مذہبی و سماجی شخصیات بھی موجود تھیں۔ علامہ سید جواد نقوی نے اس یقین کا اظہار کیا کہ اجتماعِ مینارِ پاکستان نہ صرف وحدتِ امت اور قومی یکجہتی کا عظیم مظہر بنے گا بلکہ دنیا بھر میں پاکستان کے مثبت، پُرامن اور ذمہ دار تشخص کو بھی اجاگر کرے گا۔ انہوں نے کہا کہ شہید رہبر کا راستہ وحدتِ امت، استقامت اور مظلوموں کی حمایت کا راستہ ہے اور ملتِ پاکستان ان کی خدمات اور قربانیوں کو خراجِ عقیدت پیش کرنا اپنا اخلاقی، انسانی اور قومی فریضہ سمجھتی ہے۔

انہوں نے کہا کہ پاکستان اس وقت بدامنی، دہشت گردی اور مختلف داخلی و خارجی چیلنجز کا سامنا کر رہا ہے۔ ایسے حالات میں شیعیانِ پاکستان اور تمام محبانِ وطن عناصر ملک میں امن، وحدت، استحکام اور تعمیر و ترقی کے لیے اپنا مثبت اور تعمیری کردار ادا کرتے رہیں گے۔ انہوں نے کہا کہ عسکری اور سیاسی قیادت نے خطے میں مصالحت اور ثالثی کے ذریعے جو کردار ادا کیا ہے وہ قابلِ تحسین ہے۔

رہبر انقلاب اسلامی آیت اللہ العظمی سید مجتبی خامنہ ای نے آیت اللہ شیخ اسحاق فیاض  کی رحلت پر تعزیتی پیغام جاری جاری کیا ہے۔

 اپ نے اپنے تعزیتی پیغام میں تحریر فرمایا ہے:

 بسم اللہ الرحمان الرحیم

  انا للہ و انا الیہ راجعون

مرجع عالی قدر تقلید، آیت اللہ الحاج شیخ اسحاق فیاض (طاب ثراہ) کی رحلت کی خبر سے  گہرا صدمہ ہوا۔ اس رحلت  نے دینی تعلیم کے سبھی مراکز بالخصوص حوزہ علمیہ نجف کو سوگ میں مبتلا کردیا۔
  نجف کے مقدس حوزہ علمیہ میں، اس کی عظیم ہسیتوں جیسے آیت اللہ سید ابوالقاسم خوئی رحمت اللہ علیہ سے کسب فیض، شاگردوں کی تربیت، تالیفات، حوزہ علمیہ کی علمی مہم پر دسترسی اورمومنین و مقلدین کی ہدایت اس فقیہ کی خدمات کا صرف ایک حصہ ہے جو ناقابل فراموش ہے اور آن کے آثار صالحہ ان شاء اللہ باقی رہیں گے۔  
 میں اس عظیم نقصان پر حوزہ علمیہ نجف اشرف، آپ کے سبھی مقلدین اور عقیدتمندوں، بالخصوص افغانستان کی پائیدار قوم اور آپ کے معزز خانوادے کو تعزیت پیش کرتا ہوں اور خدا وند عالم سے آپ کے لئے علودرجات، اولیائے الہی کے ساتھ محشور ہونے اور پسماندگان کے لئے صبر جمیل وجزیل کی دعا کرتا ہوں

         سید مجتبی حسینی خامنہ ای

خاتم الانبیاء سینٹرل ڈیفنس ہیڈکوارٹر کے سربراہ جنرل عبداللہی نے خبردار کیا ہے کہ اگر امریکہ نے ایران کے خلاف دوبارہ جارحیت کی تو اسے پہلے سے زیادہ سخت جواب ملے گا اور خطے میں عدمِ استحکام مزید پھیل سکتا ہے۔

اپنے ایک پیغام میں جنرل عبداللہی نے کہا ہے کہ امریکہ ایک طرف معاہدے اور مذاکرات کی بات کرتا ہے جبکہ دوسری جانب شرارتوں اور دھمکیوں کا سلسلہ جاری رکھتا ہے۔ امریکہ کے قول و فعل کا یہ تضاد خطے میں عدمِ استحکام کا بنیادی سبب ہے اور اسی وجہ سے بین الاقوامی تجارت، معیشت اور خصوصاً آبنائے ہرمز کی سلامتی خطرے میں پڑ گئی ہے۔

انہوں نے کہا کہ امریکی حکام ایرانی قوم اور اس کی مسلح افواج کی طاقت اور عزم کو درست طور پر نہیں سمجھ سکے، اسی لیے وہ بار بار غلطیاں اور بے بنیاد دعوؤں کا اعادہ کرتے ہیں۔ امریکہ اور اس کے حامی میڈیا پروپیگنڈے کے ذریعے اپنی ناکامیوں اور شکستوں کو نہیں چھپا سکتے۔

جنرل عبداللہی نے خبردار کیا کہ ایران کے تیل و گیس کے بنیادی ڈھانچے کو نشانہ بنانے کی کسی بھی کوشش کے جواب میں یہ واضح کر دیا جاتا ہے کہ یا تو تیل اور گیس کی برآمدات سب کے لیے جاری رہیں گی یا پھر کسی کے لیے بھی یہ ممکن نہیں ہوں گی۔

واشنگٹن میں اسرائیلی سفیر یخیل لائٹر نے ایک امریکی نشریاتی ادارے سے گفتگو میں اعتراف کیا ہے کہ امریکہ اور اسرائیل کے خطے میں مشترکہ اہداف ہیں اور دونوں ایران کو ایک غالب علاقائی طاقت بننے سے روکنا چاہتے ہیں۔

انہوں نے دعوی کیا کہ واشنگٹن اور تل ابیب قریبی تعاون کے ساتھ کام کر رہے ہیں تاکہ ایران خطے میں اپنے اثر و رسوخ کو مزید نہ بڑھا سکے۔ لائٹر کے مطابق امریکہ اور اسرائیل کے درمیان گہمی تعلقات، قریبی رابطہ کاری اور باہمی ہم آہنگی موجود ہے۔

اسرائیلی سفیر نے لبنان کے مسئلے کا حوالہ دیتے ہوئے دعویٰ کیا کہ ایران لبنان کے معاملے کو امریکہ کے ساتھ جاری مذاکرات سے جوڑنے کی کوشش کر رہا ہے، تاہم اسرائیل اس دونوں امور کے درمیان کسی قسم کے تعلق کو تسلیم نہیں کرتا۔ اسرائیل لبنان میں حزب اللہ کے کردار کو قبول نہیں کرے گا اور نہ ہی ایسی صورتحال کی اجازت دے گا جس میں حزب اللہ اسرائیل کے خلاف کارروائیاں کرے۔

یخیل لائٹر نے مزید دعوی کیا کہ امریکی صدر ڈونلڈ ٹرمپ کشیدگی میں کمی کے خواہاں ہیں اور اسرائیلی وزیر اعظم بنیامین نیتن یاہو بھی اس مؤقف سے اتفاق کرتے ہیں۔ 

اسرائیلی سفیر نے یہ بھی کہا کہ تل ابیب کی جانب سے حزب اللہ کے خلاف کی جانے والی کارروائیوں کا ایران سے کوئی تعلق نہیں اور تہران کو لبنان کے معاملات سے دور رہنا چاہیے، جبکہ ایران اور مزاحمتی حلقے لبنان کی صورتحال کو خطے کی وسیع تر سکیورٹی اور سیاسی صورتحال سے جوڑتے ہیں۔